English
28 სექტემბერს, ICCA-სა და ქართულ-ამერიკული უნივერსიტეტის ერთობლივი პროექტის ფარგლებში, რომელიც ესპანური ბიზნესორგანიზაციების კონფედერაციასთან პარტნიორობით ხორციელდება, საგანმანათლებლო პროგრამების პრეზენტაცია გაიმართა.
ღონისძიების ფარგლებში, მისასალმებელი სიტყვით მიმართეს აუდიტორიას ასოციაციის გამგეობის თავმჯდომარე კომპანია “ინსის” გენერალურმა დირექტორმა ზვიად თოიძემ, USAID-ის დამსაქმებლები პროფესიული განათლებისთვის პროგრამის ხელმძღვანელმა, დევიდ ბლოოდმა, ქართულ-ამერიკული უნივერსიტეტის ინჟინერიისა და ინფორმატიკის სკოლის დეკანმა, ნატა ბაჯიაშვილმა, ინდუსტრიის ესპანელმა ექსპერტმა, პროექტის პარტნიორმა, მიგელ კამბასმა და პროფესიული უნარების სააგენტოს გენერალური დირექტორის მოადგილემ, თამარ სამხარაძემ.
ღონისძიების შემდეგ ნაწილში პანელური დისკუსია შედგა სამშენებლო სექტორში არსებულ საკადრო დეფიციტზე და მისი აღმოფხვრის გზებზე, რომელშიც მონაწილეობას იღებდნენ ეკონომიკისა და მდგრადი განვითარების სამინისტროს ენერგოეფექტურობისა და განახლებადი ენერგიების პოლიტიკის და მდგრადი განვითარების დეპარტამენტის უფროსი, მარიტა არაბიძე, საქართველოს გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრის მთავარი სპეციალისტი, ნინო ტაბატაძე და ასოციაციის წევრი კომპანიების წარმომადგენლები: კომპანია “არალის” გენერალური დირექტორის მოადგილე, ეკა თათეშვილი და კომპანია “ენერგონის” პროექტების მენეჯერი გიორგი ნიკოლიშვილი.
პროგრამების პრეზენტაციები კურსის ავტორებმა წარადგინეს: სამშენებლო მიმართულებით – გივი დოლიძემ, სამუშაოების წარმოების მიმართულებით – ანა გოგბერაშვილმა და გარემოსდაცვითი სისტემების მიმართულებით – სალომე ბერეჩიკიძემ.
პროგრამებზე მიღება სულ მალე გამოცხადდება და მასში სპეციალური კვოტა იქნება გათვალისწინებული ქალებისა და ახალგაზრდებისათვის.